الاثنين، 7 يناير 2013


رواه ابو نخلة - تحشيشة 8 : مواطن على الهاتف                                                  تعليق: كريم الربيعي

 سايق الكيا بدشداشته، كزي موحد للفندقة والسياحة والمسبحة، يفتل مسبحته على يده  وهو يسوق ، حرام حتى ما تفوته تسبيحه ويجرجروه بعدين لبيت الطاعة !! وثلث محابس بيده اليمين، محفور عليها بعض الاسماء  بالاضافة الى خيط الرصيد على وجهه ، والرصيد سليم لم يمسح والحمد لله!!! لا تخافون محد يكدر ينقشه او يقفص عليه، طبعا الكروة كانت من النجف لبغداد 8 الاف دينار!!  ولكن بعد ما رن التلفون  سمعنا لان احنا مصيبة  بالهدوء ماكو اهداء منا الا الصوماليين طبعا ما اعرف ليش يستخدمون تلفونات ويخسرون فلوس  واقمار صناعية ، اذا عدنا هل الاصوات الجهورية هاي خصوصا اذا كانت القصة بيها مفسده.

سائق السيارة  بهدوء قاتل الو، ايه.. ايــــه.. ايه  اسمعك  عيني  اسمعك  لالا ... لا لا .. اغاتي انت، الله يحفظك ويسترك ، لا لا الحمد لله ، ايه ايه ... انكطع الخط ... ، رن التلفون مره ثانيه .. ايه هلا هلا عيوني انت .. اغاتي .. ايه انكطع الخط  ما ادري ايه .. قربنا يم مفرزه ... انكطع الخط.... مرينا .. باشاره  من وزن الريشه باصبع العسكري  .. رن التلفون ... ايه نعم نعم  ايه الفلوس ايه  خلي الفلوس بالبيت يم فلان...  ايهه 45 الف دينار .. وداعتك والله  والله شاهد  ولخاطر جيتك على باب الحوش " نزلتلك"  5 الاف دينار. والله اني اخذ من غيرك 50 الف  بس لخاطرك ها 45 الف ويوم الاحد العصر تجي تاخذها!!! هلا بيك الله وياك عيني................

راكب  فضولي وبشكل مفاجيء وبدون مقدمات  سال السايق  : شنهي هاي ؟

السائق : لا على مود رقم السيارة ادخله بالحاسبة !!! احم التقت  نظراتنا اني واختي ، وضحكت  ، بس ما كدرت اسكت جا والمحابس  والسبحة وخيط الرصيد، يعني الاخ اذا ياخذ مرتب فد 400 الف  من الدولة وفد سفرتين باليوم  او معدل باليوم 100 الف  وطلع الاخ عنده سيارتين ، لا تخافون داخله الحاسبة وبدون والمبلغ طالع !! وفد 10 ارقام تدخل الحاسبة باليوم هاي 500 الف ، الحساب يمكم ، اكيد مو يلبس محابس ، يحط طشت  بحزامه وذيل حصان بدل خيط الرصيد البلوجه، وكل ما يقرب يم مفرز يدگ مقتل  !!

طبعا اني مو ضد الرشوة لان اذا اريد اوكف نهار كامل على ورقة و اهدر كرامتي كبني ادم واني بعدني اشعر ببقايا هذه الكرامة والله مو ادفع 50 الف لا ادفع 100 بس تخلص وتجيني للبيت !! اعرف راح تگولون هااااااااااا !!خصوصا بوگفة العراقيين بالسره!! ماكو هيج ادب واحترام ، انگولون للاحترام والادب روح  تمشى على جدار الصين ،  بس الحق مو على الرشوه ! الحق على اللي سوى القانون!! لو هذا المواطن ارسلت له رساله من مكتب المرور واعلموه انه وبتاريخ كذا يجب حضورك لتسجيل سيارتك  ومنحك لوحة ارقام جديدة وفوكها محبس  وشريط مقتل !! هل سيدفع رشوه؟؟ لكن هذا وين والوراقين الجدد وين ورقة مختار ويجوز 3 شهود  وكتاب بلدي وصحة صدور وكتاب نفوس وصحة صدور  والناسخ والمنسوخ  وبالالوان وصحة صدور والدافع والمدفوع  واللي يتنفس بعلباك ويدخن باذنك  واليصيح واليحلف جذب  ويجوز انت واكف تحت درج حديدي وكل شويه يصعد واحد ينزل على راسك حفنه من تراب الوطن " تعزيز" لكرامة المواطن!! عجبي.. وغيرها  هواي!!  شلون تتحارب الرشوه لعد!!

اذا دائرة الجوازات ارسلت لليث  رسالة  تقول ياليث ان ناقتك مربوطة لدين عليك  و عليك الحضور واثبات الشخصية كي تاخذها!! هل سيدفع ليث 6 ورقات حتى يحصل على جواز سفر ناقته؟؟  ولو كانت التعيينات بوزارة التربية وغيرها باصول قانونية مو كرابة السيد الامي او اللي يفك الخط ويكتب عوذ هل ستدفع الناس الالاف من الدولارات كي تحصل على مكان عمل بعقد ؟؟؟

واذا كنا نريد جيش او شرطة يحمون الوطن مو دائرة  لقبض المرتبات و حفر البيذنجان، هل يدفع المتقدم 3-4 ورقات كي يصبح احد افراد ذلك الجهاز برتبة فضائي؟؟ بس اذا  المواطن الشريف جدا!! يدفع كذا ليحصل على موقع قائد فرقة، او عضو شعبه!! طبعا لازم يرجع راس المال ويحقق ربح !!

المهم السائق بعد نصف ساعة من  مكرمته على الشخص الذي تحدث معه  وخفض له 5 الاف دينار ، قال لنا  اخواني " طبعا الاخوة اويلي عراقية ودهن ودبس ماشاء الله" الاجرة  9 الاف دينار مو 8 الاف،  طبعا احنا كنا 11  راكب تقريبا يعني  مكرمة الاخ بالـ 5 الاف  راد يرجعها منا لا وبيها خمس وزكاه " فائض" بــ 6 الاف دينار !!!!!!!!!!!!!  على الرغم من الرصيد مالة والمحابس والمسبحة اللي بايده وهو يسوق !  فلا تعيبوني حين اردد قول الشاعر*إلهي:  أريدُ جرادًا لكلّ الحقول ِ //  ومحوِ جميع النقاطِ  //  وقحطا لكلّ الفصول ِ  // وطيْرًا أبابيل للإحتياط!.

* الشاعر التونسي محمد الصغير اولاد احمد " دعاء ثوري".

ليست هناك تعليقات:

إرسال تعليق