الجمعة، 23 نوفمبر، 2012

رواه ابو نخلة 5: تحشيشة بدون شيشة .. بنكهة مفاهيم عراقية!!


اذا زفر السياسي العراقي يطلع من تجاويفه ، الله يحفظه ويديمه على راس العباد ، شبابيط وحمري ومرات يطلع مسكوف خالص  بس يحتاجله اذن بفتح بار حتى تحلى الڰعده. طبعا بكل جديه يصرخون كلهم ويصرحون، والله الواحد صار يستحي من الاقمار الاصطناعية التي تنقل البث الفضائي! ومن الطائرات ، سبحان الله حديد وطاير ، وزمان كان بس يشوفون خيطها الابيض يڰعدون يقرون صورة الفاتحة لاعتقادهم بظهور صاحب الزمان !! الشباب راحوا لاميركا يعقدون صفقة اف 16 طبعا بعض دول المحيط لديها اوف 32 !! وهناك وڰبت الهوسة ، صار الملاطخ " بايت رايحة وميكا جايه " عبر الشبكة العنكبوتية الى ان ولد مجلس النواب العراقي مفهوم جديد يضاف الى قاموس علوم السياسة، حصل ذلك بعد ان فتح احدهم جوفه ونطق بعبارة  التوازن الدستوري في الطيارين؟؟ طبعا مندوب احدى المحطات الفضائية شويه خبيث راسا راح يدور على رئيس كتلة " انتبه يابا من المفخخات الاتحادية"  يريد ان يساله عن عدد الالكترونات بالجدار الخارجي مال التوازن الدستوري !! متصور الطيار مادة كيمياوية!! يعني شلون التوازن الدستوري، هل على المتقدم لوظيفة طيار ان يقدم تحليل دم  او نفس ، بيه مثلا مقدمة الدستور والمادة خمسة !!!!!!

ويبقى الخيال يطرق في رؤوس الحالمين  وبسبب كل القرارات التي اتخذت من اجل الحفاظ على عفة المراة ومنع التبرج في الكاظمية  نراهم يتغزلون بمفهوم جديد" جسد الامة الاسلامية" يعني بربكم بيه راس وصدر واطراف  جسد الامة الاسلامية لو مجرد جسد معنوي ؟؟؟؟؟؟؟؟ وبعد الجواب ما وصل طكها وزير بخطاب مؤكد على " اجماع الامة" استغفر الله، اجماع الامة مع الالتزام بالممارسة السليمة !! لعد كل هذه القوانين ومنع التبرج والاخوة  ما ادري شلون من حايط لحايط ينطون  وحتى طنطاوي وقرضاوي ماكدروا يحلون  معادلة " جسد الامة الاسلامية الذي به ...اجماع الامة بشكل ملزم وبالممارسة السلمية  والذي ينتج لنا نادي الابداع"  وتطالبون المكفوفين بغض البصر!!!

احتشموا  ... والله... فعلا مابقى عندكم توازن في  المنكر والمعروف !!!!!!!!!!!
 
كريم الربيعي

ليست هناك تعليقات:

إرسال تعليق